اسحاق ڈار جیسے سیاست دانوں کو سیاسی تاریخ میں بدنما داغ تصور کرنا چاہیے، اداکار شان شاہد
لاہور: اداکار شان شاہد کا کہنا ہے کہ اسحاق ڈار جیسے سیاست دانوں کوملکی سیاسی تاریخ میں بدنما داغ تصور کرنا چاہیے۔
شان شاہد نے اسحاق ڈار کے برطانوی نشریاتی ادارے کو دیئے گئے انٹرویو سے متعلق اپنی ٹوئٹ میں اسحاق ڈار کو مخاطب کرتے ہوئے کہا کہ یہ اپنے وجود کی گہرائی تک بے شرم ہیں، میری خواہش ہے کہ پاکستانی ادارے ایسے لوگوں کا سخت احتساب کریں، کیونکہ نہ صرف یہ پاکستان کو بدنام کررہے ہیں بلکہ ہمارے اقدار پر سوالیہ نشان بن چکے ہیں، یعنی ’کرپشن کرنا ہی بڑی کامیابی ہے۔‘
@ImranKhanPTI pic.twitter.com/5FOMARCMdx
— Shaan Shahid (@mshaanshahid) December 1, 2020
اداکار شان شاہد کا کہنا تھا کہ بدعنوان افراد کو سلاخوں کے پیچھے ڈال کر ان سے تمام جائیداد اور مال واپس لینا چاہیے جو انہوں نے اپنی روح کو فروخت کرکے بنائے ہیں، ان کے جھوٹ ایسے ہیں جو سچ کے دامن کو تار تار کردیتے ہیں، انہیں پاکستانی سیاسی تاریخ پر ایک بدنما داغ تصور کرنا چاہیے۔
شان شاہد نے یہ بھی کہا کہ ایک دیوارِ بے شرمی بناکر ان کے نام اس پر لکھے جانے چاہیئں جوہمیشہ موجود رہیں تاکہ قوم جان سکیں کہ کوئی کتنا ہی مالدار کیوں نہ ہوجائے جھوٹ کی جیت کبھی نہیں ہوتی اور نہ ہوگی۔ اس کا شعور پہنچایا جائے کہ ایمانداری اور سچائی ہی ہماری اصل اقدار ہیں۔ ساتھ ہی انہوں نے پاکستان زندہ باد بھی لکھا۔
