بھارتی میڈیا کا پراپیگنڈہ بری طرح فلاپ
نئی دہلی : بھارتی میڈیا پاکستان دشمنی میں ریٹنگ حاصل کرنے کیلیے پیشہ وارانہ اصولوں کی دھجیاں اڑانے لگا جب کہ وزیر اعظم عمران خان کے وڈیو کلپ کو توڑ مروڑ کر پیش کرنے پر اسے شرمندگی اٹھانا پڑی۔حقائق پرکھنے والی ویب سائیٹ اے ایل ٹی نیوزکےمطابق بھارتی میڈیا کی طرف سے دعوی کیا گیا کہ وزیر اعظم عمران خان نے اعتراف کیا ہے کہ بھارت نے 73برسوں میں ایسی مضبوط اور فولادی عزم رکھنے والی حکومت نہیں دیکھی جیسی اب ہے۔
یہ کلپ بھارتی میڈیا نے وائرل کر کے دعویٰ کیا کہ پاکستانی وزیر اعظم نےبھارتی حکومت کی تعریف کی ۔حالانکہ ویڈیو میں عمران خان کوکہتے سنا جا سکتا ہے کہ پاکستان کو مضبوط فوج کی ضرورت کیوں ہے؟ کیونکہ موجودہ بھارتی حکومت مطلق العنان، نسل پرست، مسلم مخالف، اسلام مخالف اور پاکستان مخالف ہے، ایسی حکومت وہاں کبھی نہیں رہی۔
مزیدبرآں انگلش ٹی وی نیوزچینل اس وقت شرم سے پانی پانی ہوگیا جب اسے وہ پراپیگنڈا واپس لینا پڑگیا جس کے تحت وہ سابق پاکستانی سفارتکار ظفرہلالی کی گفتگو کو اعتراف قراردیتا رہاکہ فروری 2019 کے بالا کوٹ فضائی حملے میں 300 ہلاکتیں ہوئیں حالانکہ اس ویڈیو میں گڑبڑ کی گئی تھی جبکہ ظفرہلالی نے کہا تھا کہ بھارتی فضائیہ مدرسے کے 300بچوں کومارنا چاہتی تھی مگرحملہ ناکام رہااوراس کے بجائے فٹ بال کے میدان پربمباری کی گئی۔
حقائق پرکھنے والی ویب سائیٹ اے ایل ٹی نیوز نے جب اس پیشہ وارانہ بددیانتی کی نشاندہی کی توصرف انڈیا ٹوڈے نے ٹویٹ کرکے وضاحت جاری کی کہ ہمارے علم میں آیا ہے کہ اس وڈیو میں گڑبڑکی گئی،اپنے قارئین کو مطلع کرنا چاہتے ہیں کہ ہمیں اس غلطی پر افسوس ہے۔
