جاتی امرا میں محمد شریف کے بیٹے شہباز شریف کے گھر حمزہ شہباز کی پیدائش، تایا نواز شریف خوشی سے نہال
شجاع آباد : جاتی امرا میں محمد شریف کے بیٹے شہباز شریف کے گھر حمزہ شہباز کی پیدائش ہوئی ہے جس پر تایا نواز شریف سمیت سارا خاندان خوشی سے نہال ہوگیا۔
یہ واضح رہے کہ یہ رائیونڈ کا جاتی امرا نہیں بلکہ ملتان کی تحصیل شجاع آباد کا گاؤں جاتی امرا ہے۔ یہاں کے شریف خاندان کو حکمران شریف خاندان سے اتنی محبت ہے کہ پورے خاندان کے نام ہی ن لیگ کے بانی خاندان پر رکھے ہوئے ہیں۔
محبت ہو تو ایسی
👇
دادا محمد شریف بیٹے نواز شریف ، شہباز شریف اور اب پوتا حمزہ
جاتی عمرہ میں شہبازشریف کے ہاں حمزہ شہباز کی ولادت ۔۔۔
ماشاءاللّٰه pic.twitter.com/k9bTKwoXPv— Saima Farooq (@SaimaFarooq) July 4, 2021
خاندان کے سربراہ محمد شریف کا کہنا ہے کہ ان کے دو بیٹوں کی پیدائش نواز شریف کے دور حکومت میں ہوئی تھی اس لیے انہوں نے اپنے بیٹوں کے نام نواز شریف اور شہباز شریف رکھے تھے۔ انہیں شریف خاندان سے محبت ہے اس لیے انہوں نے اپنے قائدین کی محبت میں یہ فیصلہ کیا۔
نومولود کے تایا نواز شریف کا کہنا ہے کہ انہوں نے ہمیشہ مسلم لیگ ن کو ووٹ دیے ہیں اور آئندہ بھی ساری زندگی ن لیگ کو ہی ووٹ دیں گے۔ انہیں خوشی ہے کہ ان کے بھائی شہباز شریف کے گھر حمزہ شہباز کی پیدائش ہوئی ہے۔
