آصف زرداری کا عمران خان کو استعفیٰ دیکر گھر جانے کا مشورہ
اسلام آباد: پیپلز پارٹی کے شریک چیئرمین آصف زرداری نے وزیراعظم عمران خان کو استعفیٰ دے کر گھر جانے کا مشورہ دے دیا۔
احتساب عدالت کے باہر میڈیا سے غیررسمی گفتگو کرتے ہوئے آصف زرداری نے کہا عمران خان اگر ملکی قرضوں کے حوالے سے 1947 سے کمیشن نہیں بنانا چاہتے تو پچھلے 20 سال کے تو بنائیں اور اگرعمران خان بہت پہلے والوں کی پگڑیاں نہیں اچھالنا چاہتے تو مشرف کے دور سے توآغاز کریں۔
آصف زرداری نے کہا عمران خان نے کیسے کہا ملک مستحکم ہو گیا؟ کیا لوگوں کی تنخواہیں بڑھ گئی ہیں؟ میرے دورمیں تو سب کی تنخواہیں بڑھتی تھیں، عمران خان کچھ بھی کہتے رہتے ہیں، پہلے عمران خان نے کہا تھا خود کو گولی مار لوں گا سیاست میں نہیں جاؤں گا، پھر کہا خودکشی کر لوں گا آئی ایم ایف نہیں جاؤں گا، عمران خان اگر میرا مشورہ مانیں تو استعفی دیں اور گھر جائیں۔
بجٹ کے حوالے سے بات کرتے ہوئے آصف زرداری نے کہا بجٹ کی منظوری کا انحصار اخترمینگل پرہے وہ کدھربیٹھتے ہیں۔
