نئی ٹیسٹ رینکنگ ، بابر اعظم نے ویرات کوہلی کو پیچھے چھوڑ دیا

لاہور : پاکستان کے آل فارمیٹ کے کپتان بابر اعظم انٹرنیشنل کرکٹ کونسل (آئی سی سی) کی تازہ ترین ٹیسٹ بلے باز رینکنگ میں سابق بھارتی کپتان ویرات کوہلی سے آگے نکل گئے ہیں۔ سری لنکا کے خلاف حال ہی میں ختم ہونے والی ٹیسٹ سیریز میں مایوس کن پرفارمنس دینے والے ویرات کوہلی چار درجے نیچے آگئے ہیں اور اب وہ رینکنگ میں نویں نمبر پر ہیں جبکہ بابر اعظم کی 8ویں نمبر پر ترقی ہوئی ہے۔

بابر اعظم اب تینوں فارمیٹس کی رینکنگ میں ویرات کوہلی سے آگے ہیں کیوں کہ ویرات کوہلی اس وقت بری فارم کا شکار ہیں جب کہ بابر اعظم شاندار فارم میں ہیں اور انہوں نے آسٹریلیا کے خلاف پاکستان کے جاری کراچی ٹیسٹ میں اپنا سب سے زیادہ ٹیسٹ سکور بنایا ہے۔آئی سی سی کی تازہ ترین رینکنگ میں آسٹریلیا کے خلاف دوسرے ٹیسٹ میں بابر کی میراتھن اننگز شامل نہیں ہے اور امید ہے کہ میچ کے اختتام کے بعد ان کی رینکنگ میں مزید بہتری آئے گی۔