چور نے فیچر سمجھ میں نہ آنے پر موبائل مالک کو واپس کردیا

مغربی بنگال: قیمتی اسمارٹ فون چوری کرنے والے شخص نے مالک کو یہ کہتے ہوئے فون واپس کردیا کہ مجھے فون استعمال کرنا نہیں آرہا ہے۔

بھارتی میڈیا کے مطابق یہ حیران کن واقعہ ریاست مغربی بنگال میں پیش آیا جہاں ایک شخص کا قیمتی اسمارٹ فون چوری ہوگیا اور چار گزرجانے کے باوجود فون نہیں مل سکا لیکن پانچویں روز چور نے خود ہی فون واپس کردیا۔

موبائل غائب ہوجانے کے بعد فون کے مالک نے بار بار کالز کیں لیکن ہر بار فون سوئچ آف ملتا تاہم حیران کن طور پر ایک روز چور نے کال اُٹھالی اور بتایا کہ مجھے فون کے فیچر سمجھ میں نہیں آرہے ہیں اس لیے فون واپس کرنا چاہتا ہوں۔
پولیس کا کہنا ہے کہ فون کی مالیت 2 ہزار 236 درہم تھی اور فون کا مالک اسے مٹھائی کی دکان کے کاؤنٹر پر بھول گیا تھا جسے بعد میں ایک شخص نے چرالیا اور چار دن اپنے پاس ہی رکھا۔

موبائل غائب ہونے پر پولیس میں شکایت درج کرانے والے مالک نے چور کی جانب سے فون واپس کرنے پر قانونی چارہ جوئی سے معذرت کرتے ہوئے اپنی شکایت بھی واپس لے لی۔