امریکی صدر کے پالتو کتوں کے ’’آفیشل‘‘ سوشل میڈیا اکاؤنٹس

واشنگٹن ڈی سی: گزشتہ چند دنوں سے یہ خبر گرم ہے کہ نومنتخب امریکی صدر جو بائیڈن کے ساتھ ان کے پالتو کتے بھی وائٹ ہاؤس میں رہیں گے، لیکن ساتھ ہی ساتھ یہ بات بھی دلچسپ ہے کہ ’’چیمپ‘‘ اور ’’میجر‘‘ نامی ان دونوں کتوں کے مشترکہ سوشل میڈیا اکاؤنٹس بھی موجود ہیں جن کے فالوورز کی تعداد بتدریج بڑھ رہی ہے۔

شاید اس سے بھی زیادہ دلچسپ بات یہ ہے کہ ٹوئٹر اور انسٹاگرام اکاؤنٹس کو یکساں نام ’’فرسٹ ڈاگز یو ایس اے‘‘ (firstdogsusa) دیا گیا ہے۔ اب کیونکہ صدر کی بیوی کو ’’خاتونِ اوّل‘‘ (فرسٹ لیڈی) کہا جاتا ہے، تو اسی وزن پر ان کتوں کو ’’سگانِ اوّل‘‘ بھی کہا جاسکتا ہے لیکن عام قارئین کی سہولت مدِنظر رکھتے ہوئے انہیں ’’امریکی صدارتی کتے‘‘ کہنا زیادہ مناسب محسوس ہوتا ہے… باقی آپ کا جو دل چاہے، کہہ لیجیے۔

Our family favorite selfie though Champ is camera-shy😍🐶#FirstDogsUSA #whitehousedogs #democracy #biden #firstdogs #major #champ #joebiden #rescuedog #whitehouse #FirstDogsUSA #bidenharris pic.twitter.com/3gtZdpICcK

— FIRST DOGS CHAMP & MAJOR BIDEN (@firstdogsusa) November 10, 2020

چیمپ اور میجر کے یہ دونوں سوشل میڈیا اکاؤنٹس جون 2020 میں بنائے گئے تھے اور جب سے جو بائیڈن امریکی صدر منتخب ہوئے ہیں، تب سے جرمن شیفرڈ نسل کے ان دونوں کتوں کے ’’یادگار صدارتی لمحات‘‘ بھی، تصویروں کی شکل میں، وقتاً فوقتاً سوشل میڈیا پر شیئر کیے جارہے ہیں۔

امید ہے کہ جنوری 2021 سے، یعنی کہ جب جو بائیڈن وائٹ ہاؤس منتقل ہوں گے، ان دونوں کتوں کی تصویریں اور ویڈیوز امریکی ایوانِ صدر سے بھی شیئر کرائی جائیں گی۔