جامعہ کراچی خودکش حملہ،پولیس نے حملہ آورخاتون کا ایک اور گھر تلاش کرلیا

کراچی :جامعہ کراچی خودکش حملے کی تحقیقات میں اہم پیشرفت ہوئی ہے، پولیس نے خودکش حملہ آور خاتون کا ایک اور گھر تلاش کرلیا، دہلی کالونی میں بھی خاتون کے شوہر نے گھر کرائے پر لیا جو خالی کردیا، ابتدائی شواہد سے خاتون کا شوہر حملے کا اہم کردار لگتا ہے۔اے آروائی نیوز کے مطابق جامعہ کراچی خودکش حملے کی تحقیقات میں اہم پیشرفت ہوئی ہے، پولیس نے خودکش حملہ آور خاتون کا ایک اور گھر تلاش کرلیاہے،دہلی کالونی میں بھی خاتون کے شوہر نے گھر کرائے پر لیا جو خالی کردیا گیا، خودکش حملہ آور خاتون کا شوہر ابتدائی شواہد سے حملے کا اہم کردار لگتا ہے۔

نیوز ایجنسی کے مطابق جامعہ کراچی میں ایک روز قبل ہونے والے خود کش حملے کی تفتیش کے سلسلے میں سی ٹی ڈی اورقانون نافذ کرنے والے اداروں نے دہلی کالونی میں 2 فلیٹس پر چھاپہ مارا ہے۔

تفتیشی ذرائع کے مطابق چھاپوں کے دوران پاکستانی اور غیر ملکی موبائل فون سمز اور دستاویزات برآمد ہوئی ہیں۔تفتیشی ذرائع نے بتایا ہے کہ کارروائی زیرِ حراست مختلف افراد کی نشاندہی پر کی گئی ہے۔

تفتیشی ذرائع کا مزید کہنا ہے کہ مختلف چھاپوں کے دوران اب تک 6 سے 7 افراد کو حراست میں لیا گیا ہے۔ تفتیشی ذرائع کا یہ بھی کہنا ہے کہ دہلی کالونی کے فلیٹس میں یہ چھاپے جامعہ کراچی دھماکے کے تناظر میں مارے گئے ہیں۔