مہوش حیات ایرانی جنرل قاسم سلیمانی کی ہلاکت پر ڈونلڈ ٹرمپ پر برس پڑیں

کراچی: اداکارہ مہوش حیات نے ایرانی جنرل قاسم سلیما نی کی ہلاکت کے باعث دنیا پر منڈلانے والے تیسری عالمی جنگ کے خطرے پر تشویش کا اظہار کیا ہے۔

گزشتہ روز عراقی دارالحکومت بغداد کے ایئرپورٹ پر امریکا کی جانب سے راکٹ حملے کیے گئے تھے جس کے نتیجے میں ایرانی جنرل قاسم سلیمانی سمیت 8 افراد ہلاک ہوگئے تھے۔ ایرانی جنرل کی ہلاکت کی خبر پوری دنیا میں جنگل کی آگ کی طرح پھیل گئی تھی، جب کہ ٹوئٹر پر قاسم سلیمانی اورتیسری عالمی جنگ کے ہیش ٹیگ ٹرینڈ کررہے تھے۔

اداکارہ مہوش حیات نے جنرل قاسم سلیمانی کی ہلاکت اور دنیا پر منڈلانے والے تیسری جنگ عظیم کے خطرات پر اظہار تشویش کرتے ہوئے کہا ہے یقین نہیں کرسکتے کہ ابھی نئے سال میں داخل ہوئے 72 گھنٹے ہی ہوئے ہیں اور دنیا جنگ کے کنارے پر جارہی ہے۔
مہوش نے مزید کہا میرا اندازہ ہے ایسا ہی ہوتا ہے جب ’’آزاد دنیا کا رہنما‘‘ بین الاقوامی قوانین کی پرواہ کیے بغیر یکطرفہ فیصلے کرتا ہے۔ یہ صرف ایران اور امریکا سے متعلق نہیں ہے۔ خدا ہماری حفاظت کرے۔

Can’t believe that just 72 hours into 2020 & the world is already teetering on the edge of war. I guess this is wht happens when the "leader of the free world"takes unilateral decisions without regard for international laws. This isn’t just abt Iran &USA.God protect us #Soleimani

— Mehwish Hayat TI (@MehwishHayat) January 3, 2020

واضح رہے کہ قاسم سلیمانی کی ہلاکت کے فوراً بعد امریکی صدر نے اپنے ٹوئٹر اکاؤنٹ پرامریکی جھنڈے کی تصویر شیئر کی تھی جب کہ پینٹاگون کی جانب سے جاری بیان میں کہاگیاتھا جنرل قاسم سلیمانی کو ڈونلڈ ٹرمپ کی ہدایت پر مستقبل میں ایران کی جانب سے حملوں کو روکنے کے لیے ہلاک کیاگیا ہے۔